江蕙

雪梅思君
作曲：歌仔戏曲调~厦门调

正月算来春酒香 家家户户门联红
红男绿女满街巷 迎新正心轻松
只有雪梅心沉重 牺生青春好花欉
为君立誓不嫁尪 甘愿来守节一世人

二月算来陈神雷 山前山后草青翠
好命有尪伴相随 赏风景心花开
讲起雪梅上克亏 每日怨叹流珠泪
一片纯情全枉费 无缘份甲君来做堆

三月算来是清明 人人扫墓上山顶
雪梅抱子到墓前 墓桌上排三牲
见景又来想旧情 伤心目屎流没停
郎君那通即侥幸 害著阮孤单过一生

四月算来春天后 无寒无热风透透
雪梅心肝乱糟糟 想郎君情意厚
目屎已经不愿流 一心望子会出头
卡苦也要来等候 甘愿来拖磨到年老

五月算来扒龙船 河边人马乱纷纷
雪梅有子无郎君 对谁人来议论
当做注定的命运 迫阮空过好青春
一生伴子守家门 忍耐著满腹的苦闷

六月算来是半年 农村收冬喜冲天
只有雪梅暗伤悲 又寂寞又空虚
坐在床前想彼时 暗中唱着断肠诗
希望子儿会成器 表明著对君的情义

七月算来日头烧 看见后庭树落叶
雪梅坚心像铁石 守清节无动摇
日日思君开声叫 夜夜梦中看会著
名声第一爱保惜 不愿给闲人来耻笑

八月算来是中秋 人人赏月心清幽
雪梅目屎条目睭 怨旧恨叹心愁
站在窗前对月娘 诚心诚意来恳求
千辛万苦愿接受 给子儿将来有成就

九月算来是重阳 拜祭亡夫情意重
一拜想起君面容 心又酸断肝肠
这世甲君命相冲 恨天怨地啥路用
雪梅对君来参详 望后世会通结成双

十月算来秋风寒 为子补衫穿针线
窗外鸿雁双做伴 引起人心空弹
鸳鸯已经来拆散 不愿搁来叹孤单
看子一年一年大 怎拖磨心也真快活

十一月算来是冬节 手来搓圆心怨嗟
自叹孤单子又细 目屎又滴落地
对子句句讲训话 劝伊认真来读册
管伊透风落霜雪 有立志成功无问题

十二月算来过年关 柴空米尽心焦烦
遵守妇道心袂乱 冷寒饿也甘愿
雪梅心内有打算 教子做人爱正端
为非做歹万人怨 做好事名声万世传

670/《雪梅思君》Suat-muî Su Kun
江蕙Kang Huī

正月算来春酒芳
tsiann--gue̍h sǹg--lâi tshun-tsiú phang
家家户户门联红
ke-ke-hōo-hōo mn̂g-liân âng
红男绿女满街巷
hông-lâm li̍k-lú muá kue-hāng
迎新正心轻松
ngiâ sin-tsiann sim khin-sang
只有雪梅仔心沉重
tsí-ū Suat-muî--á sim tîm-tāng
牺牲青春好花欉
hi-sing tshing-tshun hó hue-tsâng
为君立誓毋嫁翁
uī kun li̍p-sè m̄ kè-ang
甘愿来守节一世人
kam-guān lâi siú-tsiat tsi̍t-sì-lâng

二月算来霆新雷
jī--gue̍h sǹg--lâi tân sin-luî
山前山后草青翠
suann-tsîng suann-āu tsháu tshinn-tshuì
好命有翁伴相随
hó-miā ū ang phuānn sio-suî
赏风景心花开
siúnn hong-kíng sim-hue khui
讲起雪梅仔上克亏
kóng-khí Suat-muî--á siōng khik-khui
每日怨叹流珠泪
muí-ji̍t uàn-thàn lâu tsu-luī
一片纯情全枉费
tsi̍t-phiàn sûn-tsîng tsuân óng-huì
无缘份佮君来做堆
bô iân-hūn kah kun lâi tsuè-tui

三月算来是清明
sann--gue̍h sǹg--lâi sī tshing-bîng
人人扫墓上山顶
lâng-lâng sàu-bōng tsiūnn suann-tíng
雪梅仔抱囝到墓前
Suat-muî--á phō kiánn kàu bōng-tsîng
墓埔顶排三牲
bōng-poo-tíng pâi sam-sing
见景又来想旧情
kiàn kíng iū lâi siūnn kū-tsîng
伤心目屎流袂停
siong-sim ba̍k-sái lâu buē-thîng
郎君仔哪通遮侥幸
lông-kun--á ná thang tsiah hiau-hīng
害著阮孤单过一生
hāi tio̍h gún koo-tuann kuè it-sing

四月算来春天后
sì--gue̍h sǹg--lâi tshun-thinn āu
无寒无热风透透
bô kuânn bô jua̍h hong thàu-thàu
雪梅仔心肝乱操操
Suat-muî--á sim-kuann luān-tshau-tshau
想郎君情意厚
siūnn lông-kun tsîng-ì kāu
目屎已经毋愿流
ba̍k-sái í-king m̄-guān lâu
一心望囝会出头
tsi̍t-sim bāng kiánn ē tshut-thâu
较苦也欲来等候
khah khóo iā beh lâi tán-hāu
甘愿来拖磨到年老
kam-guān lâi thua-buâ kàu nî-lāu

五月算来扒龙船
gōo--gue̍h sǹg--lâi pê-lîng-tsûn
河边人马乱纷纷
hô-pinn jîn-má luān-hun-hun
雪梅仔有囝无郎君
Suat-muî--á ū kiánn bô lông-kun
对啥人来议论
tuì siánn-lâng lâi gī-lūn
当做注定的命运
tòng-tsuè tsù-tiānn ê miā-ūn
迫阮空过好青春
pik gún khang kuè hó tshing-tshun
一生伴囝守家门
it-sing phuānn kiánn siú ka-mn̂g
忍耐著满腹的苦闷
jím-nāi tio̍h muá-pak ê khóo-būn

六月算来是半年
la̍k--gue̍h sǹg--lâi sī puànn-nî
农村收冬喜冲天
lông-tshuan siu-tang hí tshiong-thinn
只有雪梅仔暗伤悲
tsí-ū Suat-muî--á àm siong-pi
又寂寞又空虚
iū tsi̍k-bo̍k iū khang-hi
坐在床前想彼时
tsē tsāi tshn̂g-tsîng siūnn hit-sî
暗中唱着断肠诗
àm-tiong tshiùnn tio̍h tuān-tn̂g-si
希望囝儿会成器
hi-bāng kiánn-jî ē sîng-khì
表明著对君的情义
piáu-bîng tio̍h tuì kun ê tsîng-gī

七月算来日头烧
tshit--gue̍h sǹg--lâi ji̍t-thâu sio
看见后埕树落叶
khuànn-kìnn āu-tiânn tshiū lo̍h hio̍h
雪梅仔坚心像铁石
Suat-muî--á kian-sim tshiūnn thih-tsio̍h
守清节无动摇
siú tshing-tsiat bô tāng-iô
日日思君开声叫
ji̍t-ji̍t su kun khui-siann kiò
夜夜梦中看会著
iā-iā bāng-tiong khuànn ē-tio̍h
名声第一爱宝惜
miâ-siann tē-it ài pó-sioh
毋愿予闲人来耻笑
m̄-guān hōo îng-lâng lâi thí-tshiò

八月算来是中秋
peh--gue̍h sǹg--lâi sī tiong-tshiu
人人赏月心清幽
lâng-lâng siúnn-gue̍h sim tshing-iu
雪梅仔目屎牢目睭
Suat-muî--á ba̍k-sái tiâu ba̍k-tsiu
怨旧恨叹新愁
uàn kū-hūn thàn sin-tshiû
踮在窗前对月娘
tiàm-tsāi thang-tsîng tuì ge̍h-niû
诚心诚意来恳求
sîng-sim sîng-ì lâi khún-kiû
千辛万苦愿接受
tshian-sin-bān-khóo guān tsiap-siū
予囝儿将来有成就
hōo kiánn-jî tsiong-lâi ū sîng-tsiū

九月算来是重阳
káu--gue̍h sǹg--lâi sī tiông-iông
拜祭亡夫情义重
pài-tsè bông-hu tsîng-gī tiōng
一拜想起君面容
tsi̍t-pài siūnn-khí kun bīn-iông
心又酸断肝肠
sim iū sng tuān kan-tiông
这世佮君命相冲
tsit sè kah kun miā sio-tshiong
恨天怨地啥路用
hūn-thinn uàn-tē siánn lōo-iōng
雪梅仔对君来参详
Suat-muî--á tuì kun lâi tsham-siông
望后世会通结成双
bāng āu-sè ē thang kiat sîng-song

十月算来秋风寒
tsa̍p--gue̍h sǹg--lâi tshiu-hong kuânn
为囝补衫穿针线
uī kiánn póo-sann tshng tsiam-suànn
窗外鸿雁双做伴
thang-guā hông-gān siang tsuè-phuānn
引起人心空弹
ín-khí lâng sim khang tuânn
鸳鸯已经来拆散
uan-iunn í-king lâi thiah-suànn
毋愿阁来叹孤单
m̄-guān koh lâi thàn koo-tuann
看囝一年一年大
khuànn kiánn tsi̍t-nî tsi̍t-nî tuā
怎拖磨心也真快活
tsuánn thua-buâ sim iā tsin khuìnn-ua̍h

十一月算来是冬节
tsa̍p-it--gue̍h sǹg--lâi sī tang-tseh
手来挲圆心怨戚
tshiú lâi so-înn sim uàn-tsheh
自叹孤单囝又细
tsū thàn koo-tuann kiánn iū sè
目屎又滴落地
ba̍k-sái iū tih lo̍h-tē
对囝句句讲训话
tuì kiánn kù-kù kóng hùn-uē
劝伊认真来读册
khǹg i jīn-tsin lâi tha̍k-tsheh
管伊透风落霜雪
kuán i thàu-hong lo̍h sng-seh
有立志成功无问题
ū li̍p-tsì sîng-kong bô būn-tê

十二月算来过年关
tsa̍p-jī--gue̍h sǹg--lâi kuè-nî-kuan
柴空米尽心操烦
tshâ khang bí tsīn sim tshiau-huân
遵守妇道心袂乱
tsun-siú hū-tō sim buē luān
忍寒枵也甘愿
jím kuânn-iau iā kam-guān
雪梅仔心内有打算
Suat-muî--á sim-lāi ū tá-suàn
教囝做人爱正端
kà-kiánn tsuè-lâng ài tsiànn-tuan
为非做歹万人怨
uī-hui tsuè-pháinn bān-lâng uàn
做好事名声万世传
tsuè hó-sū miâ-siann bān-sè thuân

1. 感谢 W.B. Chen 修正歌词

标签: 歌词大全